22-fevral kuni ijtimoiy tarmoqlarda Rossiyadan Oʻzbekistonga kelayotgan avtobus YTHga uchragani haqida xabar tarqaldi. Transport vazirligi yoʻlovchilar orasida Oʻzbekiston fuqarolari boʻlmaganini maʼlum qildi.

Rossiyaning Orenburg viloyatida Orenburg-Qozon trassasida yoʻlovchi avtobusi haydovchisi harakat vaqtida boshqaruvni yoʻqotishi oqibatida ariqqa agʻdarilib ketgan. Avtobus salonida 29 nafar yoʻlovchi boʻlgan, ulardan 4 nafari — bolalar. Yoʻl-transport hodisasi oqibatida halok boʻlganlar yoʻq.

Mazkur avtobus Qozogʻistonda roʻyxatga olingan boʻlib, buyurtma asosida Kostroma-Chimkent yoʻnalishi boʻyicha yoʻlovchilarni olib ketayotgan boʻlgan. Yoʻlovchilar tez yordam xodimlari tomonidan tibbiy koʻrikdan oʻtkazilgan. Shundan soʻng boshqa avtobusda harakatlanishni davom ettirgan.