29-yanvar kuni soat 16:15 larda Qoraqalpogʻiston Respublikasi Nukus shahri “Temir jol” MFYdagi 4 qavatli uyning toʻrtinchi qavatida joylashgan xonadonlarning birida havo-gaz aralashmasi chaqnashi sodir boʻlgan.

Favqulodda vaziyatlar vazirligi xabariga koʻra, yuzaga kelgan kinetik zarba natijasida bino konstruksiyalariga qisman shikast yetgan. Oqibatda uydagi bir nechta xonadonlarning tom va pol qismlari oʻpirilib, 4-qavatdan 1-qavatgacha tushib ketgan.

Zudlik bilan voqea joyiga FVV qutqaruvchilari va tegishli idoralar xodimlari yetib borib, qidiruv-qutqaruv va binoning qulagan konstruksiyalarini tozalash ishlarini amalga oshirmoqda.

Olib borilgan qidiruv-qutqaruv ishlari davomida vayronalar ostida qolib ketgan 5 yoshli qiz turli darajadagi jarohatlar bilan qutqaruvchilar tomonidan chiqarib olinib, malakali tibbiy yordam koʻrsatish uchun shifoxonaga yuborilgan.

Bino konstruksiyalari orasidan qidiruv-qutqaruv ishlari olib borish jarayonida bir nafar fuqaroning jasadi topilgan.

Ayni vaqtda binoning konstruksiyalarini tozalash ishlari davom etayotgani qoʻshimcha qilingan.

Voqea yuzasidan qoʻshimcha maʼlumot taqdim etilishi aytildi.

Avvalroq chaqnash oqibatida 2 nafar fuqaro — 2003-yilda tugʻilgan S.Sh. va 2004-yilda tugʻilgan Z.A. kuyish tan jarohati bilan shahar shifoxonasiga joylashtirilgani, ushbu uyda yashab kelayotgan qolgan fuqarolar evakuatsiya qilinib, vaqtinchalik uy-joy va uch mahal issiq ovqat bilan taʼminlangani haqida axborot berilgandi.