Samarqand viloyatidagi “Registon” ansambliga 2022-yilda 1 027 951 nafar mahalliy va xorijiy turistlar tashrif buyurgan.

Joriy yilning 1–8-yanvar kunlari esa “Registon”ga jami 17 009 nafar turist kelgan. Shulardan 11 085 nafari mahalliy (2 645 nafari bolalar) va 2 979 nafari xorijiy (300 nafari bolalar) turistlar hisoblanadi.

Qoʻshimcha qilinishicha, 2022-yilda “Registon” ansamblini takomillashtirish borasida qator ishlar amalga oshirilgan. Xususan, yil davomida olib borilgan restavratsiya va konservatsiya ishlarida topilgan noyob tarixiy ashyolar “Tillakori” madrasasidagi “Samarqand tarixiy suratlarda” nomli ekspozitsiyadan oʻrin olgan.

Shuningdek, 2022-yil 27-avgust kuni “Sherdor” madrasasidagi “Suratlarda aks etgan tarix” ekspozitsiyasidan oʻrin olgan “Mudarris va talabalar” kompozitsiyasidagi haykallar mumdan yasalgan realistik haykallar bilan almashtirilgan.

“Ulugʻbek” madrasasi shimoliy koʻcha fasadlarining 75,0 metr kvadrat qismi, “Sherdor” madrasasi janubiy koʻcha fasadlarining 60,0 metr kvadrat qismi, “Sherdor” madrasasining ichki hovli qismidagi timpan va pannolarning 60 metr kvadrat qismi, “Tillakori” madrasasining ichki hovli qismidagi timpan va pannolarning 25 metr kvadrat qismi restavratsiya qilingan.