Qoraqalpogʻistonda qidiruvda yurgan 132 nafar shaxs topilib, ushlangan va tergov boʻlimlariga topshirilgan. Bu haqda OʻzA Qoraqalpogʻiston ichki ishlar vaziri Baxtiyar Torebekovga tayanib xabar bermoqda.

Qoraqalpogʻistonda oʻtkazilgan “Antiterror” tozalash tadbirlari doirasida 18 ming 200 obyekt hamda 89 ming xonadon jamoatchilik faollari bilan birga koʻzdan kechirilgan.

Bundan tashqari, olib borilgan tushuntirish ishlari natijasida fuqarolar oʻz ixtiyori bilan 344 ov quroli, 170 oʻq-dorilarni ichki ishlar organlariga topshirgan. 12 nafar bedarak yoʻqolgan shaxs aniqlanib, ular oʻz uylariga qaytarilgan.

Oʻz navbatida, 57 mingdan ortiq huquqbuzarliklar aniqlanib, aybdorlar tegishli tartibda javobgarlikka tortilgan.