Kuchli qor yogʻishi va Gidrometeorologiya xizmati markazi maʼlumotiga asosan koʻchki xavfi yuzaga kelganligi inobatga olinib, 2023-yil 4-yanvar kuni soat 00:01 dan boshlab “Qamchiq” dovonidan oʻtuvchi A-373 avtomobil yoʻlida transportlar harakati vaqtincha cheklangan edi.

Tungi vaqtda maxsus texnikalar yordamida “Qamchiq” dovonida yoʻllarni qordan tozalash ishlari toʻxtovsiz ravishda amalga oshirildi.

Bugun, 4-yanvar kuni soat 10:00 dan boshlab “Qamchiq” dovonida transportlar harakati uchun ruxsat berildi.

Haydovchilardan oraliq masofani saqlab, tezlikni meʼyordan oshirmasdan, qoidalarga rioya qilgan holda harakatlanish soʻraladi.