Samarqandda Dok-1 Maks preparatidan 18 nafar bola vafot etgani haqida xabar berilgan edi. Sogʻliqni saqlash vazirligi ushbu preparat boʻyicha oʻrganish natijalarini eʼlon qildi.

Qayd etilishicha, holat yuzasidan Sogʻliqni saqlash vazirligining tegishli buyrugʻiga asosan maxsus ishchi guruh aʼzolari tomonidan joyiga chiqqan holda xizmat tekshiruvi oʻtkazildi. Oʻrganish natijalariga koʻra, jinoyat alomatlari mavjudligi aniqlanib, materiallar huquqni muhofaza qilish organlariga yuborildi.

Vazirlik bergan maʼlumotga koʻra, Hindistonning Marion Biotech Pvt. Ltd kompaniyasiga tegishli Dok-1 Maks tabletka va sirop dori vositasi Oʻzbekistonda 2012-yildan roʻyxatga olinib, shu yildan savdoga chiqarilgan. Farmatsevtika tarmogʻini rivojlantirish agentligi bergan maʼlumotga koʻra, har bir dori seriyalari tekshirilib, ularga muvofiqlik sertifikati berilgan. Oʻzbekistonga ushbu preparat Quramax Medical MCHJ tomonidan import qilingan.

Tekshiruv jarayonida Oʻzbekistonda oʻtkir respirator kasalliklarga chalingan 21 nafar bolaning 18 nafarida Dok-1 Maks siropini ichish natijasida oʻlim holati aniqlandi.

Vafot etgan bolalar statsionar davolanishga kelguniga qadar ushbu preparatni uy sharoitida boshqa dorilar bilan birga, 2-7 kun davomida, kuniga 3-4 mahal 2,5-5 millilitrgacha qabul qilgan. Tabiiyki, bu bolaga meʼyoridan ancha ortiq miqdor hisoblanadi.

“Barcha bolalarga preparat shifokorlar retseptisiz berilgan. Dori vositasi tarkibidagi asosiy modda paratsetamol boʻlgani uchun Dok-1 Maks siropi ota-onalar tomonidan mustaqil yoki dorixona sotuvchilarining tavsiyasi bilan shamollashga qarshi vosita sifatida notoʻgʻri qoʻllanilgan. Bu esa bemorlarning ahvoli yanada yomonlashishiga sabab boʻlgan.

Vaholanki, paratsetamol faqat tana harorati 38-38,5 darajadan yuqori boʻlgandagina kuniga 1 yoki 2 marta 1 yoshgacha bolaga 100-125 milligramm, 1 yoshdan 3 yoshgacha 200 milligramm, 3 yoshdan 5 yoshgacha bolalarga esa 250 milligramm dozada berilishi kerak. Tana harorati meʼyorida boʻlganda ushbu dori vositasini isteʼmol qilish qatʼiyan man etiladi”, — deyiladi xabarda.

Bundan tashqari, olib borilgan dastlabki laborator oʻrganishlar Dok-1 Maks siropining ushbu seriyasi tarkibida etilenglikol mavjudligini ham koʻrsatgan. Ushbu modda zaharli boʻlib, taxminan 1-2 ml/kg 95 foiz konsentrlangan eritmasi bemor salomatligida jiddiy oʻzgarishlarni, yaʼni qusish, hushdan ketish, tutqanoq, yurak-qon tomir tizimidagi muammolar va oʻtkir buyrak yetishmovchiligini keltirib chiqaradi.

Xabarda taʼkidlanishicha, vazirlik ishchi guruhi oʻrganish davomida aniqlangan barcha qonun buzilish holatlari eʼtiborga olinib, xizmat vazifasiga loqayd va beeʼtibor munosabatda boʻlgani, bolalar oʻlimi tahlilini oʻz vaqtida yuritmagani va kerakli choralarni koʻrmagani uchun 7 nafar masʼul xodim egallab turgan lavozimidan ozod etildi va qator mutaxassislarga intizomiy jazo choralari qoʻllanildi.

Toʻplangan barcha hujjatlar huquqni muhofaza qilish organlariga yuborildi.

“Ayni paytda Dok-1 Maks tabletka va sirop dori vositalari yurtimizdagi barcha dorixonalar savdosidan oʻrnatilgan tartibda qaytarib olingan. Oʻrganish materiallari asosida aniqlangan kamchiliklar, tibbiyot xodimlarining masʼuliyati masalasi Sogʻliqni saqlash vazirligining alohida hayʼat yigʻilishida koʻrib chiqiladi”, — deyiladi xabarda.