Toshkent shahridagi metropoliten yer usti liniyasining Doʻstlik–Qoʻyliq va Olmazor–Sergeli yoʻnalishlarida joylashgan 19 ta bekatni nomlash boʻyicha ishlar yoʻlga qoʻyilgani haqida xabar berilgandi.

Toshkent shahar hokimligi huzuridagi Raqamli rivojlanish departamenti tomonidan geonom.tashkent.uz sayti sinov tariqasida ishga tushirildi. Unda poytaxt aholisi metropoliten yerusti liniyasining Doʻstlik–Qoʻyliq va Olmazor–Sergeli yoʻnalishlaridagi 19 ta bekatga nom berish jarayonida qatnashdi.

Taklif etilayotgan nom:

geografik obyektga eng xos boʻlgan belgilarni aks ettirishi;

joylashgan yerdagi geografik obyektlar nomlarining mavjud tizimiga mos tushishi;

mahalliy aholining geografik, tarixiy, milliy, etnik, tilga oid va boshqa xususiyatlarini hisobga olishi;

universal va qisqa – koʻpi bilan uchta soʻzdan iborat boʻlishi kerakligi aytilgan.

Takliflar 2022-yilning 5-dekabrdan 11-dekabrgacha qabul qilindi. Endilikda davlat boshqaruvi va mahalliy davlat hokimiyati organlari, tarixchilar, filologlar, oʻlkashunos, toponimist, blogerlar hamda tegishli faoliyat sohalarida maxsus bilimlarga ega boʻlgan ekspertlardan iborat Ishchi guruh kelib tushgan takliflardan har bir bekat uchun 3 tadan nomni tanlab oladi va bu nomlar onlayn ovoz berishga qoʻyiladi.

Taklif yigʻish jarayonida 458 ta fuqaro ishtirok etib, ulardan 1900 tadan ziyod takliflar kelib tushgan.

Qonunchilik talablariga muvofiq deb topilgan nomlar tez kunlarda mahalliy aholining fikrini inobatga olish maqsadida geonom.tashkent.uz saytida onlayn-soʻrovga qoʻyiladi.

Qayd etish kerak, endilikda toshkentliklar geografik obyektlarni nomlashda ham onlayn qatnasha oladi. 18 yoshga toʻlgan va poytaxtda doimiy yoki vaqtincha roʻyxatda boʻlgan fuqarolar geonom.tashkent.uz saytida roʻyxatdan oʻtib, Toshkent shahridagi yangi geografik obyektlarni nomlash va mavjudlarini qayta nomlashda ishtirok etishi mumkin.