Energetika vaziri oʻrinbosari Sherzod Xoʻjayevga koʻra, tez kunda cheklovlar masalasi 80 foizga hal etiladi.

U bu haqida AOKAda oʻtkazilayotgan matbuot anjumanida maʼlum qilgan.

«Buning uchun tabiiy gaz va elektr energiyasi eksporti toʻxtatildi. Tashqi import 20 foizga oshirildi. Bugungi kundagi uzilishlar 8-10 soatlab tokni oʻchirishga sabab boʻlolmaydi.

Qaysi hududlarda elektr energiyasidagi uzilishlar yarim yoki bir soatdan oshib ketayotgan boʻlsa, buning sabablarini oʻrganamiz. Agar bunda inson omili mavjud boʻlsa, masʼullarga chora koʻriladi», — deya qayd etgan vazir oʻrinbosari.

“Oʻzbekneftgaz” boshqaruv raisi Mehriddin Abdullayev jurnalistlarning savollariga javob berar ekan, GTL kompaniyasidagi ishlab chiqarish 50 foizga kamaytirilib, qolgan gaz aholiga berilishi rejalashtirilayotganini maʼlum qildi.