Bugun, 11-oktabr kuni soat 05:45da A-373 “Toshkent-Oʻsh” xalqaro avtomobil yoʻlining 222,5 kilometri, “Qamchiq” dovoni qismida yoʻl-transport hodisasi sodir boʻldi.

“Vodiy-Toshkent” yoʻnalishida harakatlanib ketayotgan “VOLVO” rusumli yuk mashinasi haydovchisi kutilmaganda boshqaruvni yoʻqotib, qarama-qarshi yoʻnalishga chiqib ketgan va 5 tonnalik hamda 8 tonnalik “ISUZU” yuk mashinalari bilan toʻqnashgan.

Yoʻl-transport hodisasi oqibatida 8 tonnalik “ISUZU”da yongʻin kelib chiqqan.

Voqea joyiga FVVning “Qamchiq” maxsus qidiruv, yongʻin-qutqaruv boshqarmasi qutqaruvchilari va YPX xodimlari yetib borgan.

Qutqaruvchilar maxsus asbob-anjomlar va texnikalar yordamida yonayotgan mashinani soat 06:07 da oʻchirishgan. Shuningdek, hodisa oqibatlarini bartaraf etishga Favqulodda vaziyatlar davlat quyi tizimiga kiruvchi tashkilotlar kuch-vositalari ham jalb etilgan.

Qutqaruvchilar tomonidan voqea joyida jabrlangan 3 nafar yuk mashinalari haydovchilariga birinchi tibbiy yordam koʻrsatilib, malakali tibbiy yordam koʻrsatish uchun shifoxonaga yuborilgan. Hodisa oqibatida halok boʻlganlar yoʻqligi qoʻshimcha qilingan.