Issiqlik taʼminoti tariflari tasdiqlandi. Unga koʻra aholi va tadbirkorlar uchun narxlar oʻzgarmaydi.

Toshkent shahar Xalq deputatlari Kengashi 2022—2023-yillar isitish mavsumi uchun issiqlik taʼminoti xizmatlari tariflarini tasdiqladi. Jismoniy shaxslar, shuningdek, kichik, oʻrta va yirik biznes uchun tariflar avvalgi holda qoladi.

Issiqlik taʼminoti xizmatlari uchun chakana tariflar quyidagicha:

aholi uchun — 91 960 soʻm/Gkal (2019-yil 15-avgustdan amalda);

kichik, oʻrta va yirik biznes uchun — 141 737 soʻm/Gkal (2019-yil 15-avgustdan amalda).

Budjet tashkilotlari uchun chakana tarif – 502 067 soʻm/Gkalni tashkil qiladi. Ushbu tarif eʼlon qilingan kundan boshlab 15 kun oʻtib, yaʼni 2022-yil 21-oktyabrda kuchga kiradi.

Taʼkidlanishicha, bazaviy va chakana tariflar oʻrtasidagi farq Toshkent shahrining mahalliy budjeti hisobidan subsidiyalanadi.

Maʼlumot uchun, Toshkent shahrining issiqlik taʼminoti tizimini 2022-yil 1-iyuldan boshlab Fransiyaning Veolia kompaniyasiga tegishli “Veolia Energy Tashkent” MCHJ XKning shoʻ’ba kompaniyasi 30 yil davomida boshqaradi.