Joriy yilning 22-24-sentyabr kunlari Samarqand shahrida suzish boʻyicha X-Osiyo chempionati oʻtkaziladi.

Osiyo suzish federatsiyasi shafeligida oʻtadigan mazkur nufuzli musobaqada qitʼaning koʻplab nomdor sportchilari sovrinli oʻrinlar uchun kurash olib borishadi.

Ayni paytga kelib tashkilotchilar tomonidan tayyorgarlik ishlarining soʻnggi bosqichi olib borilmoqda. Jumladan, Osiyo chempionatining sovrindorlariga taqdim etiladigan esdalik sovgʻalari, diplom va medallar shular jumlasidan.

Kuni kecha tarixiy qitʼa chempionati gʻolib va sovrindorlariga beriladigan medallarning koʻrinishi tashkilotchilar tomonidan namoyish etildi.

Medalning old tomonida Osiyo chempionatining ramzi oʻrin olgan. Medalning orqa tomonida esa dunyoga mashhur Registon maydoni, Osiyo suzish federatsiyasi nomlanishining qisqartmasi hamda qitʼa chempionati oʻtkaziladigan sana koʻrinishi oʻrin olgan.