Oyina.uz tahririyat “eshig”ini qoquvchilar uchun informativ ijtimoiy loyiha – “Eshik qoqqan kim boʻldi?”ning navbatdagi soni bilan tanishing.

– Taq-taq!

– Kim u?

– Men o‘qituvchiman...

– Juda yaxshi! Bizga savolingiz bormi?

– Milliy sertifikat tizimi haqida to‘liqroq ma’lumot olmoqchi edim.

– O‘zbekiston Respublikasi Vazirlar Mahkamasining 2020-yil 12-oktabrdagi “Umumta’lim fanlarini bilish darajasini baholashning milliy test tizimini joriy etish to‘g‘risida”gi 646-son qaroriga binoan umumta’lim fanlari bo‘yicha milliy test tizimi joriy etilgan. Mazkur test sinovida ishtirok etgan va test sinovi natijasi bo‘yicha belgilangan ballni to‘plagan talabgorlar milliy sertifikatga ega bo‘ladilar.

– Milliy sertifikatni kim beradi?

– Milliy sertifikat Oliy ta’lim, fan va innovatsiyalar vazirligi huzuridagi Bilim va malakalarni baholash agentligi (sobiq Davlat test markazi tomonidan) elektron shaklda beriladi.

– Tushunarli… Milliy sertifikat imtihonida kimlar ishtirok eta oladi?

– Oʻz bilimini sinab koʻrish istagini bildirgan istalgan shaxs umumta’lim fanlaridan milliy sertifikat imtihonida ishtirok etishi va tegishli sertifikatni qoʻlga kiritishi mumkin.

– Zo‘r-ku! Milliy sertifikatning qanday imtiyozlari bor?

– Agar oʻqituvchi milliy sertifikat imtihonida 80 % yoki undan yuqori natijani qoʻlga kiritsa, oylik maoshiga 20 % ustama qoʻshib beriladi.

Agar abituriyent 86 % va undan yuqori natijani qoʻlga kiritsa, tegishli fanidan kirish imtihonlarida maksimal ball beriladi.

Agar 60 % dan 86% gacha natijani qoʻlga kiritsa, foizga nisbatan proporsional ball beriladi. Masalan, 80 % natija uchun maksimal 93 ballning 80 % miqdorida (74,4) ball beriladi.

Shuningdek, magistraturada oʻqishini davom ettirmoqchi boʻlganlar ham xorijiy tillar boʻyicha milliy sertifikat olishlari mumkin. Ma’lumot uchun, Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan chet tili imtihonlari har oyda (iyul, avgust va sentabr oylaridan tashqari) tashkil etib kelinmoqda va imtihonlar jadvali har yarim yillik uchun oldindan e’lon qilinadi.

– Mening savollarim pedagog kadrlar uchun beriladigan milliy sertifikatlar tizimiga oid. Masalan, o‘qituvchilarga beriladigan ustamalar tartibi qaysi qonun hujjatiga asoslangan?

– Ustama belgilash tartibi O‘zbekiston Respublikasi Prezidentining 2022-yil 11-maydagi “2022–2026-yillarda xalq ta’limini rivojlantirish bo‘yicha milliy dasturni tasdiqlash to‘g‘risida”gi 134-son farmoniga asoslanadi. Aytganimizdek, Bilim va malakalarni baholash agentligining milliy sertifikatiga ega bo‘lgan pedagog kadrlarga o‘z tarif stavkasiga nisbatan 20 % miqdorida ustama to‘lanadi.

– Chet tilidan sertifikati bor pedagoglarga ham shu foizda to‘lanadimi?

– Aynan 134-sonli farmonda belgilanishicha, 2025-yil 1-yanvarga qadar chet tili fanidan kamida C1 darajadagi milliy sertifikatga ega bo‘lgan pedagog kadrlarga har oylik ustama 50 % miqdorida to‘lanadi.

Umuman chet tilini bilish darajasini baholash va malaka sertifikatini berish tartibi esa Vazirlar Mahkamasining 2013-yil 31-dekabrdagi 352-son qarori bilan tasdiqlangan “Chet tilini bilish darajasini aniqlash va malaka sertifikatini berish tartibi to‘g‘risida”gi nizomga muvofiq amalga oshiriladi.

– Test savollarini kim tuzadi? Qiyin bo‘lmaydimi?

– Umumta’lim fanlarini bilish darajasini aniqlash va davlat namunasidagi sertifikatni berish uchun tuziladigan test savollari davlat ta’lim standarlariga mos ravishda hamda ta’lim o‘quv dasturiga muvofiq Bilim va malakalarni baholash agentligi tomonidan ishlab chiqiladi.

– Menga juda ma’qul bo‘ldi… Sertifikat olish maqsadida test sinovida qatnashish uchun ro‘yxatdan qanday o‘taman?

– Siz uzbmb.uz sayti orqali elektron ariza berib ro‘yxatdan o‘tishingiz mumkin.

– Xo‘p, ro‘yxatdan o‘tganimni qanday bilishim mumkin?

– Ro‘yxatdan o‘tish uchun zarur hujjatlarni kiritilganingizdan so‘ng Siz uchun Bilim va malakalarni baholash agentligining rasmiy veb-saytida shaxsiy kabinet yaratiladi.

To‘lovni amalga oshirganingizdan so‘ng ro‘yxatdan o‘tgan hisoblanasiz. Shu tariqa Siz bilan Bilim va malakalarni baholash agentligi o‘rtasida ommaviy oferta shartnomasi tuziladi.

– Ro‘yxatdan o‘tish uchun to‘lov qanday amalga oshiriladi?

– To‘lovni bazaviy hisoblash miqdorining 1,5 baravari miqdorida amaldagi elektron to‘lov tizimlari orqali ariza berilgan kundan boshlab uch kun mobaynida amalga oshirasiz. To‘lov to‘g‘risidagi ma’lumotni shaxsiy kabinetingiz orqali bilishingiz mumkin.

– Test sinovini o‘tkazish joyi va sanasi haqida qayerdan ma’lumot olaman?

– Albatta, o‘zingizning shaxsiy kabinetingizdan.

– Test sinovi natijalarini qanday bilishim mumkin?

– Test sinovlari yakunlangandan keyin 20 ish kunidan kechikmay Bilim va malakalarni baholash agentligining rasmiy veb-saytida natijalar e’lon qilinadi.

– Sertifikatning amal qilish muddati 3 yil, to‘g‘rimi?

– Xuddi shunday.

– Ijobiy natijaga erishsam, sertifikatni qanday olaman?

– Shaxsiy kabinetingiz orqali elektron shaklda yuklab olishingiz mumkin.

– Test sinovi natijasidan qoniqmasam, qayta topshirishim mumkinmi?

– Albatta. Test sinovlari natijalari e’lon qilingandan so‘ng qayta ro‘yxatdan o‘tib, belgilangan muddatda test sinovlarida ishtirok etishingiz mumkin bo‘ladi.

Batafsil ma’lumot olish uchun, “Umumta’lim fanlarini bilish darajasini aniqlash va sertifikat berish tartibi to‘g‘risida”gi nizom bilan tanishib chiqishni tavsiya qilamiz.

– Yaqin dugonam Musiqa fani o‘qituvchisi. U ham milliy sertifikat olsa bo‘ladimi?

– Yo‘q, hozircha qoraqalpoq tili va adabiyoti, o‘zbek tili va adabiyoti, rus tili va adabiyoti, fizika, kimyo, matematika, geografiya, biologiya va tarix kabi fanlardan, shuningdek, bir nechta xorijiy tillar bo‘yicha milliy sertifikat olish mumkin.

– Zaruriy ma’lumotlar uchun sizlarga katta rahmat!

– Arzimaydi, Oyina.uz doim xizmatingizda.

Sirojiddin RUSTAMOV,

Oyina.uz

Materialni tayyorlashda Oliy ta’lim, fan va innovatsiyalar vazirligi huzuridagi Bilim va malakalarni baholash agentligi veb-sayti ma’lumotlaridan foydalanildi.

Loyihaning avvalgi soni bilan ham tanishing.

Oyina.uz'ni Telegramda o‘qing!