Тошкент вилояти Чиноз туманида яшайдиган ихтирочи йигит Маҳкамов Жаҳонгирга Инновацион ривожланиш вазирлиги томонидан ёрдам берилмаётгани ҳақида хабарлар тарқалмоқда. Ижтимоий тармоқларда мазкур ҳолат муҳокамаларга сабаб бўлди. Ҳолат юзасидан вазирлик муносабат билдирди.



Қайд этилишича, Жаҳонгир Маҳкамов 2020 йилнинг январь ойида Инновацион ривожланиш вазирлигига таклиф этилган ва унга стартап лойиҳалар танловида иштирок этиш имкониятлари ҳақида маълумотлар берилган. Тегишли меъёрий-ҳуқуқий ҳужжатларга кўра, стартап лойиҳага вазирлик 1,5 млрд. сўмдан ошиқ маблағ бера олмайди. Ж. Маҳкамов, лойиҳасини амалга ошириш учун жами 5 млрд. сўм маблағ сўраган.


Бу стартапларга ажратиладиган пул маблағларидан анчайин кўп бўлгани сабабли у яратган ишланмалар — доимий қувватга эга электродвигатель, қуруқ зарядли ва тез тикланувчи аккумулятор ва ток кучайтиргичи вазирлик томонидан ташкил этилган ишчи гуруҳи томонидан ўрганиб чиқилган.

«Ўзбекэнерго» илмий-техник маркази лаборатория мудири, т.ф.д., проф. Тўлаган Камолов, И. Каримов номидаги ТДТУнинг «Электрик машиналар» кафедраси профессори, т.ф.д. Камолиддин Олимхўжаев ва кафедра мудири т.ф.д. Олимжон Тоиров, Тошкент Темир йўл муҳандислари институти кафедра мудири Усан Бердиев, «Ўзагротехсаноатхолдинг» АЖ конструкторлик бюроси мудири Шерзод Аҳмедов ва технологик бўлими мудири Сайфиддин Асамов, Инновацион ривожланиш вазирлиги бўлим бошлиғи Мирзиёд Мирсаитовдан иборат ишчи гуруҳ Чиноз туманига бориб, ихтирочи томонидан тақдим этилган ишланмаларни дастлабки кўрикдан ўтказган.



Маҳкамов томонидан яратилган ускуналарнинг мукаммаллаштирилган прототипларини яратиш у томонидан тузилган сарф-харажатлар сметаси бўйича қатор саволлар туғилган. Шундан сўнг, Маҳкамовга смета харажатлари қисқартириб, Инновацион ривожланиш вазирлиги томонидан ўтказиладиган стартап лойиҳалар танловига топшириш маслаҳат берилган. Лекин шу пайтгача Жаҳонгир Маҳкамовдан танловга лойиҳа қайта ҳисоб-китоб қилиниб топширилмаган ва асослантирилган ҳужжатлар келиб тушмаган.


«Маҳкамовнинг ихтироси илмий асосланмаганлиги ва илмий лойиҳа бўлмаганлиги ҳамда ғоя шаклидаги дастлабки қўлбола ишланма бўлганлиги боис Инновацион ривожланиш вазирлиги томонидан бундай ишларни асослантирилган ишланмагача такомиллаштириш учун биринчи босқичда одатда ўртача 10 млн сўмдан 700 млн. сўмгача бўлган маблағ ажратилиши кўзда тутилган.


Шу ўринда, таъкидлаш жоизки лойиҳа ишончли деб топилиб, асослантирилган таклифлар тайёрланса, танлов комиссияси, илмий-техник кенгаш ва вазирлик Ҳайъати томонидан кейинги босқичларда кўриб чиқилиб, кичик ҳажмли ишлаб чиқаришни ташкил қилиш учун энг кўпи билан 1,5 млрд. сўм маблағ ажратилиши мумкин. Ҳар қандай ишланмани кенг миқёсда ишлаб чиқариш бу бизнес лойиҳа бўлиб, тадбиркор зарур маблағларни банкдан кредит сифатида олиш тавсия этилади. Шунингдек, Ж. Маҳкамов Ўзбекистонда ҳозирда фаолият юритаётган UzVC венчур фондига маблағ сўраб мурожаат қилиш имкониятига эга. Ўз навбатида, хусусий венчур фондлари ҳам биринчи босқичда биз сўраган ишларни амалга оширишни таклиф қилади.

Айни пайтда Инновацион ривожланиш вазирлиги ҳузурида INNO технопаркида мазкур қурилмаларнинг прототипларини тайёрлаш учун барча шароитлар, асбоб-ускуналар мавжуд. Маҳкамовни мана шу технопаркда ўз ихтиросини устида ишлаш учун таклиф этамиз», дейилади муносабатда.