Ўзбекистоннинг айрим ҳудудларида гало ҳодисалари кузатилмоқда. «Ўзгидромет» мутахассиси осмонда юз бераётган ушбу ҳодиса юзасидан тушунтириш берди.

Маълум қилинишича, бу оптик, умуман хавфсиз табиат ҳодисаси ҳисобланади. Бунда қуёш ва ой атрофида, баъзан эса кўча чироқлари каби бошқа кучли ёруғлик манбалари атрофида кўринади. Гало ҳодисаси юқори тропосферада 5–10 километр баландликда асосан, патсимон булутлардаги муз кристалл зарралари билан боғлиқ бўлади.

Гало турлари патсимон булутлари кристалларининг шакли ва жойлашганига боғлиқ. Кристал муз заррачалар кучли ёруғлик таъсирида ёрқин ёй шаклидаги камалакранг ҳодисани вужудга келтиради.