Ўзбекистон Республикасининг айрим қонун ҳужжатларига ўзгартиш ва қўшимчалар киритилади. Бу ҳақида Ички ишлар вазирлигининг тегишли қонун лойиҳасида қайд этилган.

Унга кўра «Фуқаролар давлат пенсия таъминоти тўғрисида»ги қонунинг 37-моддасини иккинчи қисми қуйидагича тўлдирилиши мумкин: «озодликдан маҳрум этишга ҳукм қилинган шахслар томонидан жазони ижро этиш муассасаларида жазо муддатини ўташ даврида бажарилган ҳар қандай иш, агар ушбу иш учун ижтимоий солиқ тўланган бўлса».

«Кексалар, ногиронлар ва аҳолининг бошқа ижтимоий эҳтиёжманд тоифалари учун ижтимоий хизматлар тўғрисида»ги қонунга эса қуйидагича ўзгартириш ва қўшимчалар киритилмоқда:

• 6-модда олтинчи хатбошидаги «аҳолининг ижтимоий эҳтиёжманд тоифаларидир» деган сўзлар чиқариб ташланади. Еттинчи хатбоши билан эса «озодликдан маҳрум этиш тарзидаги жазони ўтаб бўлган шахслар аҳолининг ижтимоий эҳтиёжманд тоифаларидир» жумласи билан;
• 13-модда олтинчи хатбоши «озодликдан маҳрум этиш тарзидаги жазони ўтаб бўлган шахсларга «Дастлабки ижтимоий-моддий ёрдам пакети»ни бериш билан боғлиқ хизматлар» жумласи билан тўлдирилади.

Шунингдек, ижтимоий хизматлар кўрсатиш шаклларига озодликдан маҳрум этиш тарзидаги жазони ўтаб бўлган шахсларга «Дастлабки ижтимоий-моддий ёрдам пакети»ни бериш билан боғлиқ хизматлар тоифаси қўшилиб, алоҳида модда сифатида ёритиб берилмоқда.

«Дастлабки ижтимоий-моддий ёрдам пакети»ни бериш билан боғлиқ хизматлар қуйидаги турларни ўз ичига олади:

• ижтимоий хизматлар кўрсатиш масалалари бўйича маслаҳатлар бериш, ижтимоий хизматлар кўрсатувчи тегишли органлар ва ташкилотларга йўналтириш;
• махсус психологик ёрдам кўрсатиш;
• бандликка кўмаклашиш, шу жумладан ўзининг тадбиркорлик, меъморчилик, ҳунармандчилик каби йўналишларда аниқ лойиҳаларини тақдим этиб, мустақил фаолиятни бошламоқчи бўлган фуқароларга бир марталик моддий ёрдам бериш;
• биринчи тиббий ёрдам кўрсатиш, диспансер кўригидан ўтказиш, зарур бўлган ҳолларда стационарда даволаниш учун юбориш, тиббий кўрсатмаларга кўра дори воситалари, протез-ортопедия буюмлари ва реабилитация техник воситалари билан таъминлаш.