Oyina.uz сайтида эълон қилинган Амир Темур “ўлим отаси” сифатида талқин қилинган ролик ҳақидаги материал ижтимоий тармоқ фойдаланувчилари ўртасида кенг муҳокамаларга сабаб бўлди. Зиёлилар, блогерлар ва тармоқ фойдаланувчилари Туризм ва спорт вазирлигининг ушбу роликдаги маълумотларни рад этмагани, ҳатто расмий саҳифасида улашгани қаттиқ танқид қилинди. Шундан сўнг вазирлик ахборот хизмати расмий муносабат билдирди.

Қайд этилишича, ушбу ролик Туризм ва спорт вазирлиги ташаббуси билан тасвирга олинмаган, муаллифлар билан бу бўйича ҳеч қандай келишув ҳам бўлмаган.

“Вазирлик видеоролик аввалида соҳибқирон Амир Темур ҳақида айтилган фикрларга хайрихоҳ эмас. Шундай бўлса-да, қайд этиш жоизки, видеороликларда томошабиннинг эътиборини жалб қилиш учун ҳам “бадиий тўқима” қўлланилган бўлиши мумкин, бу аудиторияни жалб қилиш мақсадида тез-тез ишлатиладиган услубдир. Видеороликнинг ўзини умумий оладиган бўлсак, бу каби видеолар мамлакатимизнинг туристик салоҳиятини тарғиб қилишда ижобий хизмат қилади”, дейилади хабарда.

Шунингдек, вазирлик мазкур видеоролик бўйича саволлар билан ролик муаллифларига мурожаат қилиш мақсадга мувофиқ бўлишини таъкидлаган.