Ўзбекистон Республикасининг Оила кодексига киритилаётган ўзгартиришларга кўра, отанинг исмини болага фамилия сифатида бериш масаласи кўзда тутилмоқда. Олий Мажлис Қонунчилик палатасининг 13 январдаги мажлисида депутатлар Оила кодексига тегишли қонун лойиҳасини биринчи ўқишда қабул қилди.

Унга кўра, Адлия вазирлиги томонидан ишлаб чиқилган қонун лойиҳаси парламент қуйи палатасидаги сиёсий партиялар фракцияларининг йиғилишларида биринчи ўқишда қизғин муҳокама қилинган. Ўзбекистоннинг айрим қонун ҳужжатларига давлат хизматларини кўрсатиш тизимини янада такомиллаштириш, манфаатлар тўқнашувининг олдини олиш, шунингдек, ФҲДЁ соҳасидаги муносабатларни тартибга солишга қаратилган ўзгартириш ва қўшимчалар киритиш кўзда тутилган.

Қайд этилишича, қонунчиликка киритилаётган мазкур ўзгартириш билан агар ота хоҳласа, ўз исмини фарзандига фамилия қилиб бериши мумкинлиги назарда тутилади.