«Ойгаинг» юқори тоғли метеорологик кузатув станциясида хизмат олиб бораётиб оғир аҳволда қолган ходим вертолётда эвакуация қилинди. Бу ҳақда Мудофаа вазирлиги хабар берди.

5 январь куни Угам–Чатқол тоғ тизмасининг бориш қийин бўлган, мураккаб релефга эга ҳудудида жойлашган «Ойгаинг» юқори тоғли метеорологик кузатув станциясида хизмат олиб бораётган ходими оғир аҳволда қолган.

Қайд этилишича, у ҳарбий ҳаво кучлари ёрдамида эвакуация қилиниши зарур бўлиб, ҳолат юзасидан Ўзгидромет раҳбарияти Мудофаа вазирлигига маълум қилган.

Мудофаа вазирлиги Ҳарбий-ҳаво кучларининг навбатчи қидирув-қутқарув вертолёти ёрдамида тунги вақтда қутқарув тадбирлари амалга оширилиб, ходим тезкорлик билан Чирчиқ шаҳридаги тиббиёт муассасасига етказилган ва шифокорлар томонидан унга ўз вақтида тиббий ёрдам кўрсатилган.