22 сентябрь куни Ўзбекистон Республикаси Президент Шавкат Мирзиёев АҚШ ишбилармонлари билан учрашув ўтказди. Унда Американинг йирик компания раҳбарлари, халқаро молия институтлари ҳамда АҚШ ҳукумати вакиллари иштирок этди. Унда Ўзбекистондаги давлат ташкилотлари ва хусусий компаниялар АҚШ компаниялари билан ҳамкорликка оид битимлар имзоланди.

Учрашувда АҚШ президентининг Жанубий ва Марказий Осиё бўйича махсус вакили Сержио Гор Ўзбекистон президенти Шавкат Мирзиёев учун энди Оқ уйга тўғридан-тўғри мурожаат йўли очиқ эканини, Дональд Трамп уни Вашингтонда кутаётгани маълум қилган. Учрашувида нутқ сўзлаган махсус вакил шунингдек, Трамп Шавкат Мирзиёев билан мулоқотдан завқ олганини таъкидлаган.

«Мен президент Трампнинг махсус вакилиман. Ҳозиргина жаноб Трамп билан мулоқот қилдим. Бугун эрталаб у сизлар билан бўлишимни айтди ва дастуримизни кўриб чиқди. Президент Трамп менга биринчи айтган сўзи шундай бўлди, у сиз билан мулоқотдан катта завқ олди. У сизга ўзининг самимий саломини йўллади», — деди Гор.

Вакил Шавкат Мирзиёевга Вашингтонда уни Дональд Трамп кутаётганини маълум қилди.

«Энди эса сизда исталган вақтда Оқ уй офисига тўғридан-тўғри мурожаат йўли очиқ. Бу дегани муносабатларни мустаҳкамлаш учун зарур бўлган барча шарт-шароитлар мавжуд. Мен бу ердаги ўта самимий муносабатни президентга етказаман. У сизни Вашингтонда кутяпти. Ўзаро манфаатларга оид барча масалалар ҳал этилади. Биз сизнинг барча қарорларингизни қўллаб-қувватлаймиз», — деди АҚШ Президенти вакили.

«Сизлар Boeing 787 ни харид қилмоқдасиз ва президент бундан жуда мамнун бўлди ва яна айнан бугун эрталаб у сиз билан бўлган телефон орқали мулоқот ҳақида гапираркан, суҳбат жуда илиқ ва самимий ўтганлигини таъкидлади. Президент Дональд Трамп, АҚШ ва Ўзбекистон ўртасидаги муносабатларни қўллаб-қувватлаб келмоқда. Шунинг учун ҳам икки давлат ўртасидаги муносабатларни мустаҳкамлайдиган ҳуқуқий ҳужжат лойиҳаси қўллаб-қувватланади», — деди Трампнинг махсус вакили.

У икки мамлакат ўртасида савдо айланмаси тез суръатда ўсиб бораётганини таъкидлади. Янги келишув ва шартномалар уни янада равнақ топишини таъминлашини билдирди.

Бу ерда Boeing’дан ташқари соғлиқни сақлаш тизими, IT, стратегик минераллар соҳасида юқори натижаларга эга йирик компаниялар вакиллари бор. Улар Ўзбекистонда ўз бизнесларини ривожлантиришга тайёр. Жаноб президент, АҚШнинг барча йирик компаниялар вакиллари Ўзбекистонда ишончли ҳамкорга айланишни, биргаликда ишлашни истамоқда", — деди Гор.

Сержио Гор нутқини давом эттирар экан, у яна бир бор президент Трамп Шавкат Мирзиёев билан суҳбат қилишни жуда интиқлик билан кутаётганини қайд этди.

«Сизни Ўзбекистон футбол жамоаси жаҳон чемпионатига чиққани билан яна бир бор табрикламоқчиман. Энди Ўзбекистон жамоаси мундиалда. Икки мамлакат раҳбарлари ўртасидаги самимий мулоқот келгусида катта ютуқларга эришишимиз учун кенг йўл очиб беради», — деди махсус вакил сўзининг якунида.