Ўзбекистон президенти ҳузуридаги хавфсизлик кенгаши котибининг ўринбосари, президентнинг ташқи сиёсат масалалари бўйича махсус вакили Абдулазиз Комилов Ishonch.uz сайтига "Янги Ўзбекистоннинг ташқи сиёсатига чизгилар" мавзуида интервью берди. Интервью давомида томонлар асосан Марказий Осиё давлатларининг ҳамкорлиги ва улар ўртасидаги муносабатлар тарихи ҳамда халқаро муносабатлар истиқболлар ҳақида сўз юритади.

Хусусан, журналист Абдулазиз Комилов раҳбарлигидаги Ўзбекистон делегациясининг АҚШга бориб келгани ва бу том маънода мамлакат расмий делегациясининг янги Америка маъмурияти билан биринчи мулоқоти бўлгани ҳақида сўради. АҚШ ташқи сиёсатида ўзининг форматларини бутунлай ўзгартираётган бир вақтда бу ташриф икки томонлама стратегик мулоқотнинг илк пойдевори бўлиши ҳақида Абдулазиз Комилов шундай дейди:

"Мана, Америкада Президент сайловлари ўтди, янги администрация ташкил бўляпти, ҳукумат аъзолари тайинланяпти. Ва кўп йиллар мобайнида ҳеч ўзгармаган ташқи ишлар сиёсатининг устувор, долзарб йўналишларида, ҳаттоки катта, йирик давлатлар билан, Европа, НАТО давлатлари билан ўзаро ва бошқа минтақалар билан ўзгаришлар бўляпти. Шунинг учун бизда ҳам шу савол туғилди:

"Мана, янги администрация келди, кўп нарса ўзгаряпти. Биз АҚШ билан ўз сиёсатимизда, ҳамкорлигимизда қандай қилиб давом этамиз?" Албатта, биз мана шундай катта давлат билан алоқалар ривожланишидан манфаатдормиз. Нега?

Биринчидан, Америка бу энг катта иқтисодий салоҳиятга эга, ҳарбий нуқтаи назардан энг кучли давлат. Буни Сўнгги йиллар Америка ялпи ички маҳсулотининг ҳажми 29 триллион бўлган. Бу йил фақат ҳарбий бюджети 1 триллион (1000 миллиард).

Бизнинг орамизда қандайдир сиёсий муаммолар йўқ. Аввал инсон ҳуқуқлари, мажбурий меҳнат, диний эркинликлар деган муаммолар бор эди, дейишарди. Буларнинг ҳаммасини биз кун тартибидан олиб ташладик. Кўп қарорлар қабул қилдик. Масалан, болалар пахтага бормаяпти, ажойиб бўлди, бунинг ўрнига ўқишяпти.

Бизнинг делегация ҳақиқатан сайловдан кейин биринчи бўлиб борди. Бундан мақсад - маслаҳат ўтказиш эди. Бизнинг делегацияни Оқ уйда, Сенатда, Хавфсизлик кенгашида, Конгрессда жуда илиқ қабул қилишди. Бунга қўшимча равишда, бизнес доиралар билан ҳам учрашдик. Улар Ўзбекистонга катта қизиқиш билдиришини таъкидлаб айтди.

Ҳамкорликнинг давомийлиги

Нима учун давомийлиги деяпман, чунки биз бу алоқаларни бошидан бошламаймиз. 2018 йилда ҳурматли Шавкат Миромоновичнинг АҚШга тарихий ташрифлари бўлди. Нега тарихий, деганда ўша вақтда жаноб Президент Дональд Трамп ва Шавкат Миромонович икковлари келишиб, стратегик ҳамкорликнинг янги даврини очиб беришди. Ҳозир бўлса, ўша келишувларни давом эттирамиз. Қандайдир катта ўзгаришлар ёки олдингидек Ўзбекистонга танқид ё эътирозларга ҳозир ҳеч қандай сабаб йўқ.

Бундан ташқари, Ўзбекистоннинг минтақадаги ролини катта баҳолаб, айниқса, Марказий Осиёда олиб борилаётган Президент сиёсатини қўллаб-қувватлаб, улар бизга Ўзбекистон улар учун жуда муҳим давлат эканини таъкидлаб айтишди.

Шунинг учун бир катта кун тартиби яратилди ва биз АҚШ билан яқин ҳамкорликни давом эттирамиз" - дея тегишли саволга жавобини якунлайди Абдулазиз Комилов.