Ўзбекистон ва Қирғизистон 2025 йил ёзидан «Тошкент-Балиқчи (Рибаче)» йўналишида туристик поездлар қатновини йўлга қўйишга келишиб олди. Бу Иссиқкўл йўналишида сайёҳлар оқимини ошириш имконини беради.

Мустақил Давлатлар Ҳамдўстлигига аъзо давлатлар темирйўл транспорти бўйича кенгашнинг 81 йиғилиши доирасида «Ўзбекистон темирйўллари» АЖ бошқарув раиси З.Нарзуллаев ва «Қирғиз темирйўли» давлат корхонаси раҳбари А.Сакиев ўртасида икки томонлама учрашув бўлиб ўтди.

Учрашув давомида юк ташиш ҳажмларини ошириш ва тариф чегирмаларини қўллаш масалалари бўйича музокаралар олиб борилди. Шунингдек, икки давлат ўртасида асосий юклар – кўмир, цемент ва бошқа маҳсулотларни ташишда «Темирйўлкарго» АЖ юк вагон паркларидан фойдаланиш ҳамда тарози хўжалиги объектларини таъмирлаш масалалари кўриб чиқилди.

Томонлар, шунингдек, 2025 йил ёзидан Тошкент – Балиқчи йўналишида туристик поездлар қатновини йўлга қўйишга келишиб олди. Бу йўналиш икки мамлакат ўртасида туризм алоқаларини ривожлантиришда муҳим қадам бўлади ҳамда Иссиқкўл йўналишида сайёҳлар оқимини ошириш имконини беради.

Бундан ташқари, Қирғизистон темирйўл ходимларини «Ўзбекистон темирйўллари» АЖ марказларида малакасини ошириш масаласи ҳам муҳокама қилинди ва ушбу йўналишда ўқув дастурларини ташкил этишга келишилди.