Тошкент шаҳри ҳокимлиги ва «Тошкент инвест» компанияси Янгиҳаёт туманида жамоат савдо-кўнгилочар бульварини қуриш учун инвестор қидирмоқда. Узунлиги 1 км бўлган ушбу бульварда тамаддихоналар, спорт, савдо ва болалар учун кўнгилочар жойлар бўлади.

Тошкент шаҳри ҳокимлиги «Тошкент инвест» компанияси билан биргаликда пойтахт тадбиркорларига Янгиҳаёт туманида давлат-хусусий шериклиги (ДХШ) асосида жамоат савдо ва кўнгилочар бульварини ташкил этиш бўйича экологик лойиҳада иштирок этишни таклиф қилди.

«Ушбу бульвар – болалар билан дам олиш, гастрономия, кўнгилочар тадбирлар ва шаҳар ҳаёти бирлашадиган жой бўлади», – дейилади пойтахт ҳокимлиги хабарида. Режага кўра, бульвар ҳудуд аҳолисининг спорт, савдо-сотиқ билан шуғулланиши учун ҳам имконият яратади.

Лойиҳа иншоотлари енгил конструкциялардан қурилади, бу эса инвесторлар учун қурилиш жараёнини тезлаштиради, дейилади хабарда. Дастлабки босқичда лойиҳа қуйидагиларни ўз ичига олади:

гастрономик ҳудуд: қаҳвахоналар, ресторанлар, тез тайёрланувчи таомлар (фаст фоод) ва бошқалар;

спорт ҳудуди: фитнес маркази, баскетбол майдончаси, футбол майдони ва кўча спорти учун бошқа иншоотлар, шунингдек, спорт товарлари дўконлари;

савдо ҳудуди: кийим-кечак дўконлари, эко бозор ва бошқа савдо бинолари;

болалар кўнгилочар ҳудуди: батут маркази, ўйин майдончалари ва болалар автодроми.

Лойиҳа майдони 3,1 гектарни, бульварнинг узунлиги эса 1 километрни ташкил этади. Режалаштирилган контейнерлар (савдо майдончаларини жойлаштириш учун) 250 та бўлади.

Ҳокимликнинг қайд этишича, объект давлат-хусусий шериклик шартлари асосида инвесторга узоқ муддатли ижарага берилиши мумкин.

Бульвар Янгихаёт тумани, Сергели-8 турар жой массиви, Тошкент ҳалқа автомобиль йўли бўйлаб қурилади.

Лойиҳанинг дастлабки концепцияси аллақачон ишлаб чиқилган бўлиб, уни «Тошкент инвест» компанияси билан боғланиш орқали кўриш мумкин.