Фото: Газета.uz

Фуқаролар жамоат жойларида тартибни сақлаш учун бешта муҳим қоидани ёдда тутишлари лозим.

1-қоида — Жамоат жойларидаги барча қонун ва қоидаларга амал қилиш. Бунда жамоат жойларида тамаки чекиш, спиртли ичимликлар истеъмол қилиш ёки овозни баландлатиш каби тақиқланган ҳаракатлардан тийилиш назарда тутилади.

2-қоида — Бошқа фуқароларга нисбатан ҳурмат ва одобни сақлаш. Ушбу қоида навбатда туриш, бошқаларга йўл бериш ва жамоат транспортида ўрин бериш каби одоб-ахлоқ қоидаларига амал қилишни ўз ичига олади.

3-қоида — Тозаликка риоя қилиш. Жумладан, ҳар бир шахс жамоат жойларини тоза сақлаш учун чиқиндиларни махсус белги қўйилган жойларга ташлаш шарт. Бу билан у атроф-муҳитни муҳофаза қилишга ёрдам бериш билан бирга ўз бурчини ҳам бажарган бўлади.

4-қоида — Хавфсизлик қоидаларига амал қилиш. Фуқаролар жамоат жойларида хавфсизлик қоидаларига амал қилиши лозим. Бунга йўл ҳаракати қоидаларига риоя қилиш, хавфсизлик белги ва кўрсатмаларига амал қилиш кабилар киради.

5-қоида — Жамоат мулкини муҳофаза қилиш, уни эҳтиётлаш ва бузмаслик. Масалан, ҳар бир шахс хиёбонлар, ўриндиқлар, фонтанлар ва бошқа жамоат жойларини муҳофаза қилишни ўзларининг бурчи ва вазифаси деб билиши лозим.

Мазкур 5 та қоидадан ташқари жамоат жойида қуйидаги хатти-ҳаракатларни амалга ошириш ҳам тақиқланади:

▪️ тамаки маҳсулотларини истеъмол қилиш, шунингдек чилим ва электрон сигареталар чекиш;

▪️ уятли сўзлар билан сўкиниш, ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи шу каби бошқа хатти-ҳаракатларни содир этиш;

▪️ алкоголь маҳсулотини истеъмол қилиш;

▪️ тиланчилик қилиш;

▪️ рўйхатдан ўтказилмаган байроқлар ва вимпеллардан фойдаланиш;

▪️ ит ва мушукларни тумшуқбоғсиз ва етовсиз олиб юриш.

Маълумот учун, фуқароларнинг жамоат жойларида мазкур ҳаракатларни содир этиши маъмурий ёки жиноий жавобгарликка тортилишига асос бўлади.