Бугун, 7 октябрь куни, соат 15:45 да Қашқадарё вилояти Қарши туманига қарашли «Дашт» МФЙ ҳудудида жойлашган автомобилларга суюлтирилган газ қуйиш шохобчасида Камаз-512 русумли автомобилидан сиғимга (ёмкостга) газ қуйиш вақтида газ-ҳаво аралашмасининг чақнаши содир бўлган. Чақнаш натижасида ёнғин юзага келган.

ФВВ 4 та ёнғин-қутқарув экипажи соат 15:56 да ҳодиса жойига етиб бориб, воқеа жойи соат 16:00 да ўраб олингани ва ёнғин соат 16:45 да ўчирилганини маълум қилди.

Ҳодиса натижасида шохобча биносининг 22 кв/м майдонида том қисми ёниб, зарарланган. Тан жароҳати олган ва вафот этганлар аниқланмаган.

Ҳозирда ёнғин сабаби ва моддий зарар миқдори аниқланмоқда.

Воқеа жойига вилоят ва туман ФВБ раҳбар ходимлари етиб келган.