Туркияда ота-она қарамоғидан маҳрум бўлган 3 нафар вояга етмаган бола Ўзбекистонга қайтарилди.

Турли сабаблар туфайли қаровсиз қолган 16 ёшли ва 6 ёшли 2 нафар қиз ва 11 ёшли 1 нафар ўғил боланинг ватанга қайтиши яқин қариндошларнинг мурожаатлари асосида бажарилган.

Уларни Ўзбекистонга олиб келиш Истанбул шаҳридаги Бош консулхона, Ички ишлар ва Соғлиқни сақлаш вазирликлари ҳамкорлигида амалга оширилган.

Болалар 2 октябрь куни масъул ходимларнинг кузатуви остида Тошкент шаҳрига юборилган.

Консуллик ўз хабарида ота-оналардан вояга етмаган фарзандларини хорижий давлатларда назоратсиз қолдирмасликларини, бефарқ бўлмаган фуқаролардан эса чет элда қаровсиз қолиб кетган болажонлар тўғрисида зудлик билан Ўзбекистон Республикасининг хорижий дипломатик ваколатхоналарига хабар беришларини сўраган.