Ўзбекистон Stadler компаниясидан иккита таркиб харид қилишни режалаштирмоқда. Бу ҳақда транспорт вазири Илҳом Маҳкамов маълум қилди.

«Ўзбекистон-2030» ривожланиш стратегиясида ҳар йили ҳаракат таркибларини янгилаш белгиланган.

Илҳом Маҳкамовнинг айтишича, купе, платскарт ва ўриндиқли таркибларини харид қилиш учун алоҳида дастур тузилган. Бунда Ўзбекистон бўйлаб 5 соатгача бўлган йўналишларда электропоездларни харид қилиш кўзда тутилган.

2024 йилда Хивага қадар темирйўл тизимини электрлаштириш якунига етказилади. Ушбу йўналишда Жанубий Кореянинг Hyundai Ротем поездлари ҳаракатланади.

Бундан ташқари, Европанинг Стадлер компаниясидан иккита таркиб харид қилинмоқда. Бу поездлар Ўзбекистон йўлларида синаб кўрилиб, ишлатилганидан сўнг, каттароқ кўламда кўпроқ харид қилиш бўйича қарор қабул қилинади.