Асосий олимпиаданинг биринчи (мактаб) босқичи 16-30 сентябрь кунлари ўтказилади.

Жумладан, 2024/2025-ўқув йилида Асосий олимпиаданинг мактаб босқичини ўтказиш бўйича тавсиялар ҳамда муддатлари келтирилган Мактабгача ва мактаб таълими вазирлигининг (2024 йил 9 сентябрдаги 02-31-1335-сонли хат) хати ҳудудларга юборилган.

Унда келтирилишича, олимпиадалар 17 та фан бўйича ташкил этилади.

Олимпиада ўтказиладиган жой ва муддатлари бўйича барча ўқувчилар олимпиададан камида 3 кун олдин (эълонлар тахтаси, ижтимоий тармоқлар ва Телеграм гуруҳларга эълон жойлаштириш, фан ўқитувчилари томонидан машғулотлар вақтида, умумий сафланишда оғзаки эълон қилиш ва бошқалар) хабардор қилиниши шарт.

Беллашувларда ҳар бир фан ва синф кесимида иштирокчилар қатнашиб, улар орасидан баллар кетма-кетлигида 3 нафаргача ғолиб аниқланади ҳамда асосий олимпиаданинг кейинги босқичида иштирок этиш учун тавсия этилади.

Тавсия этилган ўқувчилар ҳамда уларнинг ўқитувчилари ҳақидаги маълумотлар эса Мактабгача ва мактаб таълими вазирлигининг olympiad.uzedu.uz ахборот тизимига жойлаштирилиши зарур.