Ўзбекистон ва Қирғизистон президентлари икки давлат маданият ва санъат соҳаси вакилларини фахрий унвонлар билан мукофотлади.

Шавкат Мирзиёевнинг 5 сентябрдаги фармони билан Қирғизистоннинг маданият ва санъат соҳасидаги қуйидаги икки вакили фахрий унвон билан мукофотланди:

Ўзбекистон Республикаси халқ артисти фахрий унвони билан — Т.Сатилганов номидаги Қирғиз миллий филармониясининг эстрада-симфоник оркестри бадиий раҳбари ва бош дирижори Омурбаев Нур Санташевич;

Ўзбекистон Республикасида хизмат кўрсатган артист фахрий унвони — эркин ижодкор, комуз созандаси Дуйшенбек уулу Закирбек.

Садир Жапаровнинг шу куни имзоланган фармони билан Ўзбекистоннинг маданият ва санъат соҳасидаги икки вакилига фахрий унвонлар берилди:

Ўзбекистон Маданият вазири Озодбек Назарбековга — Қирғизистон халқ артисти фахрий унвони;

Юнус Ражабий номидаги Ўзбек миллий мусиқа санъати институти «Анъанавий мақом ижрочилиги» кафедраси катта ўқитувчиси Фарангиз Маҳмудовага — Қирғизистонда хизмат кўрсатган артист унвони.

Ҳужжатда айтилишича, ушбу унвонлар Қирғизистон ва Ўзбекистон ўртасида маданият ва санъат соҳасидаги дўстлик ва ҳамкорликни мустаҳкамлашга қўшган катта ҳиссаси учун берилди.