Тошкент шаҳар Шайхонтоҳур туманида жойлашган Чорсу бозори ҳудудидаги кийим дўконларининг бирида ёнғин чиқди. Тошкент шаҳар ФВБ ҳолат юзасидан маълумот берди.

Маълум бўлишича, 25 август куни соат 20:48 да Тошкент шаҳар Шайхонтоҳур тумани Зарқайнар кўчасида жойлашган дўконларнинг бирида ёнғин содир бўлаётгани тўғрисида Тошкент шаҳар ФВБга хабар келиб тушган.

Шундан сўнг, ёнғин-қутқарув техникалари айтилган манзилга соат 20:53 да етиб борган ва ёнғин соат 21:06 да ўчирилган.

Ёнғин натижасида кийим дўконининг ички қисми (15 кв/м. майдон) зарар кўрган.

Ҳозирда ёнғин сабаби ва моддий зарар миқдори аниқланмоқда.

Ҳодиса оқибатида ҳалок бўлган ва жабрланганлар йўқ.