“Док-1 Макс” сиропидан болалар ўлими бўйича суд мажлисида судья Самарқанд вилояти Соғлиқни сақлаш бошқармасининг собиқ бошлиғи қамоққа олинганини маълум қилди.

Дарё нашрига кўра, бу ҳақда “Док-1 Макс” иши бўйича Тошкент шаҳрида кўрилаётган суд ишида судья Мусо Юсупов судланувчилардан бирининг сўровига жавобан маълум қилган.

Аввалроқ ушбу айбланувчи сироп ҳақида жамоатчиликни хабардор қилган самарқандлик шифокорлар ва вилоят ССБ бошлиғини судга чақириб, уларнинг кўрсатмасини олиш бўйича илтимоснома киритганди.

“Самарқанд вилояти соғлиқни сақлаш бошқармаси бошлиғига нисбатан бу бўйича қамоққа олиш тарзидаги эҳтиёт чораси қўлланилган. Қўшимча жиноят иши қўзғатилиб, тергов ҳаракатлари олиб борилмоқда”, — дея таъкидлади судья.