Суриядаги жангларда террорчилик ташкилотларидан бирига раҳбарлик қилган Ўзбекистон фуқароси ҳалок бўлди, деб хабар бермоқда Тошкент шаҳри Ички ишлар бош бошқармаси матбуот хизмати.

Хабарда маълум қилинишича, ҳалок бўлган фуқаро, 1972 йилда туғилган Улуғбек Бабамуратов Тошкент шаҳри Юнусобод туманида вақтинча рўйхатдан ўтган, маълумоти ўрта. 2009−2010 йилларда Термиз шаҳрида “Жиҳодчилар жамоати”ни ташкил қилган.

2011 йилда гуруҳ аъзоларининг кўпчилиги ҳибсга олинган, қолганларига қидирув эълон қилинган. Бу пайтда Россияда бўлган “Термиз жамоати” аъзолари Туркияга қочиб ўтган.

2013 йил май ойида Улуғбек Бабамуратов Сурияда “Катибат ул имом ал-Бухорий” халқаро террорчилик ташкилотини тузган. Ўша йили унга нисбатан Жиноят кодексининг 244−2-моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилиб, қидирувга берилганди.

“Улуғбек Бабамуратов Абдурасуловичнинг Суриядаги жанговар ҳаракатлар чоғида вафот этгани тўғрисида тезкор маълумотлар олинган”, — дейилади хабарда.