Ўзбекистонда сафарбарлик чақирув резервининг (1 ойлик ҳарбий хизмат) тўлов бадали меҳнатга ҳақ тўлашнинг энг кам миқдорининг 7 баробарига (6 млн 860 минг сўм) тенг. Бу ҳақда 18 август куни АОКАда ўтказилган брифингда Мудофаа вазирлиги ахборот хизмати раҳбари Отабек Йўлдошев маълум қилди.

Тўлов бадалини 1 йил давомида бўлиб тўлаш ҳам мумкин.

“Президент қарорига асосан, Ўзбекистон фуқароларининг сафарбарлик чақирув резервининг тўлов бадали меҳнатга ҳақ тўлашнинг энг кам миқдорининг 7 баробари (6 млн 860 минг сўм) этиб белгиланган. Вазирлар Маҳкамасининг 2003-йил 22 февралдаги қарорига мувофиқ, сафарбарлик чақирув резерви сафига олинган шахслар томонидан пул бадаллари хизматга олингандан кейин томонларнинг келишувига кўра, 1 йил мобайнида бирйўла тўлиқ ҳажмда ёхуд босқичма-босқич амалга оширилиши мумкин”, — деди Отабек Йўлдошев.

 

Маълумот учун, айни пайтда Ўзбекистонда меҳнатга ҳақ тўлашнинг энг кам миқдори 980 000 сўм.