Озарбойжон пойтахти Боку шаҳрида 1—4 август кунлари “Ўзбекистон маданияти кунлари” бўлиб ўтади. Бу ҳақда “Дунё” хабар бермоқда.

Ушбу тадбир икки давлат раҳбарларининг олий даражадаги учрашувларида эришилган келишувлар доирасида уюштирилаётгани айтилган.

“Ўзбекистон маданияти кунлари” дастуридан ўзбекистонлик таниқли санъаткорлар иштирокида катта концерт, Озарбойжон Миллий кутубхонаси биносида ташкил этилган “Ўзбекистон адабиёти ва санъати” бурчагининг очилиш маросими ўрин олган.

Шунингдек, ўзбек романчилигининг асосчиси Абдулла Қодирий қаламига мансуб “Ўткан кунлар” асарининг озарбойжон тилидаги нашри тақдимоти, миллий ошпазлик ва ҳунармандчилик кўргазмалари, мамлакат театр жамоалари иштирокидаги спектакллар намойиши ўтказилади.