Шавкат Мирзиёев қўшма ҳукуматлараро комиссиянинг навбатдаги йиғилишида иштирок этиш учун Ўзбекистонда бўлиб турган Тожикистон бош вазири Қоҳир Расулзодани қабул қилди.

Президент матбуот хизматининг хабар қилишича, 12 май куни бўлиб ўтган учрашувда Ўзбекистон—Тожикистон яхши қўшничилик, стратегик шериклик ва иттифоқчилик муносабатларини янада мустаҳкамлаш масалалари кўриб чиқилди, амалий ҳамкорликни кенгайтириш истиқболлари муҳокама қилинди.

Товар айирбошлашни ошириш, энергетика, машинасозлик, қишлоқ хўжалиги, транспорт, қазиб чиқариш, тўқимачилик, фармацевтика ва бошқа тармоқларда истиқболли лойиҳаларни илгари суришга алоҳида эътибор қаратилди.

Фото: Президент матбуот хизмати

Шу маънода, 12 май куни Тошкентда икки мамлакат бош вазирлари раислигида ўтказилган қўшма Ҳукуматлараро комиссия йиғилиши қарорларини амалга ошириш муҳимлиги таъкидланди.