Бугун, 17 ноябрь куни Ўзбекистоннинг кўплаб вилоятларида қор ёғмоқда. Республиканинг барча ҳудудларига Волга бўйи орқали шимолдан нам ва совуқ ҳаво массаси кириб келиши оқибатида ҳарорат кескин совуди. Бироқ Тошкентдаги бу ёғин одатий қордан фарқ қилади.

«Ўзгидромет» бир неча кун аввал 17-18 ноябрь куни чангли бўрон кузатилиши мумкинлигини хабар қилган эди. Чанг зарралари қорга бирикиши натижасида айни пайтда лойли қор ёғмоқда. Буни қорда юрган йўловчиларнинг эгнидаги пальто, сумка ва оёқ кийимларида қолаётган лой изларидан, шунингдек уюм ҳосил қилган қорнинг хира эканлигидан ҳам сезиш мумкин.