Ўзбекистон Президенти Шавкат Мирзиёев Ҳиндистон Бош вазири Нарендра Модининг таклифига биноан 12 январь куни «Глобал Жануб овози» саммитининг ялпи мажлисида иштирок этади.

Ҳиндистоннинг «Катта йигирматалик»даги раислиги доирасида онлайн шаклда ўтказиладиган тадбирда Бангладеш, Вьетнам, Камбоджа, Мўғулистон, Бирлашган Араб Амирликлари, Таиланд ва бошқа мамлакатларнинг давлат ва ҳукумат раҳбарларидан иборат жами 120 та мамлакат делегациялари қатнашади.

Саммитнинг мақсади ривожланаётган мамлакатларнинг манфаатларини илгари суриш ва долзарб муаммоларини ҳал этиш йўлида, шу жумладан иқтисодиёт, экология, энергетика ва озиқ-овқат хавфсизлиги, соғлиқни сақлаш, инсон ресурсларини ривожлантириш, инновациялар, туризм ва бошқа йўналишлардаги ўзаро манфаатли ҳамкорликни чуқурлаштириш юзасидан фикр алмашиш ва аниқ таклифларни ишлаб чиқишдир.