Шавкат Мирзиёев Туркия президенти Ражаб Таййип Эрдоғонни Ўзбекистоннинг олий даражали «Имом Ал-Бухорий» ордени билан тақдирлади.

«Ҳурматли Ражаб Таййип Эрдоғон жаноби олийлари! Сизларни Самарқандда кўриб турганимдан хурсандман. Бугун тарихий воқеа. Бугун қардошим Ражаб Таййип Эрдоғон Ўзбекистоннинг олий даражали «Имом Ал-Бухорий» ордени билан тақдирланди.

Хабарингиз бор, 2017 йили БМТнинг 72-сессиясида улуғ бобомиз Имом Ал-Бухорийнинг меросини ўрганиш ҳақида гапиргандим ва ўша пайтда Туркия президенти, қардошим Ражаб Таййип Эрдоғон бу фикрларни қўллаб-қувватлаган эди. Ўзбекистонда Имом Ал-Бухорий номидаги Тошкент Ислом университети фаолият кўрсатмоқда.

Улуғ аждодимиз ривоят қилган ҳадиси шарифда: «амаллар ниятларга боғлиқдир» деб таъкидланади. Шу боис ҳам биз Ўзбекистонда Имом Бухорий бобомизнинг меросини чуқур ўрганиш учун Самарқанд заминида ул зотнинг номида халқаро илмий-тадқиқот маркази ва ҳадис илми мактабини ташкил этдик.

Ўзбекистон халқи Сизнинг қардош элларимиз ўртасидаги дўстона алоқаларни кенг қамровли стратегик шериклик даражасига олиб чиқиш, ўзаро манфаатли лойиҳаларни самарали амалга ошириш борасидаги шахсий ҳиссангизни яхши билади ва юксак қадрлайди.

Ишончим комилки, умумий тил ва маданиятга, аждодларимизнинг бой меросига, муштарак интилишга асосланган дўстлик ва қардошлик муносабатларимиз янада равнақ топади», — деди Шавкат Мирзиёев.

Шунингдек, Туркия президенти ҳам нутқ сўзлаб, фиқҳ илмини эгаллаган киши номидаги орденнинг берилишини юксак қадрлашини ва ушбу орден мамлакатлар ўртасидаги азалий ва абадий ҳамкорликнинг натижаси деб билишини маълум қилди.

«Ҳурматли президент, азиз меҳмонлар, сизларни азиз туйғуларим ила саломлайман. Фиқҳ илмини эгаллаган киши номидаги орденни менга берилишини юксак қадрлайман. Ушбу орден мамлакатларимиз ўртасидаги азалий ва абадий ҳамкорликнинг натижаси деб биламан.

Буюк бир фахр ила, ғурур ила ушбу юқори даражали орденни олишдан яна бир бор бахтли эканлигимни таъкидлаган ҳолда, қардошим Шавкат Мирзиёевга миннатдорчилик билдираман. Авваламбор, шуни айтмоқчиманки, талабалик йилларимизда Имом Ал-Бухорийнинг ҳадислар тўплами билан яқиндан танишганмиз. Бу биз учун авваламбор энг муҳим манба сифатида қўлланилган. Бирор ҳадис ҳақида гап кетганда, биз ушбу ҳадислар китобига мурожаат қилганмиз», — деди Ражаб Таййип Эрдоғон.

Маълумот учун, «Олий даражали Имом Бухорий» ордени илм-фан ва маданият, жумладан, ислом маърифати ривожига улкан ҳисса қўшган буюк аллома ва мутафаккирларнинг ҳаёти ҳамда илмий меросини ўрганиш ва халқаро майдонда кенг тарғиб қилишда катта ютуқларга эришган хорижий давлатлар ва ҳукуматлар раҳбарларига берилади.