Ijtimoiy tarmoqlarda Toshkent shahar Mirzo Ulugʻbek tumanida joylashgan 142-sonli umumiy oʻrta taʼlim maktabida ichki ishlar organlari xodimlari, maktab maʼmuriyati hamda oʻquvchilar oʻrtasida oʻtkazilayotgan profilaktik suhbat jarayoni aks etgan video va fotosurat tarqalib, keng muhokamalarga sabab boʻldi.

Toshkent shahar IIBB maʼlum qilishicha, 10-sentyabr kuni soat 08:30 larda maktab rahbariyati va voyaga yetmaganlar masalalari boʻyicha inspektor psixologlar ishtirokida oʻquvchilar oʻrtasida “Davomat” va “Tigʻ” tadbirlari boʻyicha profilaktik suhbat oʻtkazilgan.

Profilaktik tadbir jarayonida 11-sinf oʻquvchisi B.M. yonida gʻilofsiz holda kanselyariya qaychisini olib yurgani aniqlangan. Maktab oʻquvchilariga sovuq qurol, jumladan oʻtkir tigʻli buyumlarni olib yurish taqiqlangani, kanselyariya qaychisini darsda foydalanish uchun gʻilofda sumkada olib yurish mumkinligi tushuntirilgani aks etgan foto ijtimoiy tarmoqlarda tarqalgan.

Shuningdek, profilaktik suhbat jarayonida maktab direktori tomonidan oʻquvchilarga maktabda kiyim kiyish qoidalari, tashqi koʻrinishga ahamiyat berish kerakligi tushuntirilgan.