O‘zbekiston xalqining uch ming yildan ortiq davlatchilik tarixining ajralmas qismi bo‘lgan harbiy tarix, sarkardalarning harbiy mahorati, milliy Qurolli kuchlarning barpo etilishi va rivojlanish bosqichlari, shuningdek, mamlakatda harbiy sohada amalga oshirilayotgan o‘zgarishlarni xalq, ayniqsa, yoshlar va dunyo jamoatchiligiga tanitish va targ‘ib etish maqsadida, Vazirlar Mahkamasining 3-iyundagi qarori bilan Qurolli kuchlar davlat muzeyi negizida O‘zbekiston harbiy san’ati tarixi davlat muzeyi tashkil etiladi.

Hujjatga ko‘ra, Mudofaa vazirligi Madaniyat vazirligi, Madaniy meros agentligi, Fanlar akademiyasi Tarix instituti va O‘zbekiston Badiiy akademiyasi bilan birgalikda muzey ekspozitsiyalarini yuksak g‘oyaviy-badiiy saviyada yaratish uchun eng iste’dodli va mahoratli ijodkorlar hamda mutaxassislarni jalb etadi.

Muzeyning umumiy ko‘rinishi va me’moriy tuzilishi milliy uslub hamda an’analarga mos bo‘lishi, ekspozitsiyalar jahondagi ilg‘or tajribalarni o‘zida mujassam etishi ta’minlanadi. Muzey ekspozitsiyalari va kompozitsiyalari ta’sirchan, interaktiv usullar, innovatsion texnologiyalar va sun’iy intellekt imkoniyatlaridan keng foydalangan holda yaratiladi.