AOKAda talabalarni turar joy bilan taʼminlash, ijara va toʻlov-kontrakt masalalari mavzusida oliy taʼlim vaziri Abduqodir Toshqulov ishtirokida matbuot anjumani boʻlib oʻtdi.

Tadbirda vazirga yildan-yilga yangi kvotalar, yoʻnalishlar ochilayotgani, biroq yangi ish oʻrinlari yaratilmay turib, bunaqa yoʻnalishlarni ochib tashlayverish qanchalik toʻgʻri ekani borasida savol berildi.

Abduqodir Toshqulovga koʻra, bu oʻquv yilida yoʻnalishlar umumlashtiriladi, kamaytiriladi. 

“60 ta taʼlim yoʻnalishini professional taʼlim darajasiga tushirdik. Masalan, universitetlarda «kutubxona yoʻnalishi” degan taʼlim yoʻnalishi bor, holbuki bu yoʻnalish boʻyicha texnikumlar ham mutaxassis chiqara oladi. Bakalavriatdagi 2 mingdan ortiq taʼlim yoʻnalishini bu oʻquv yilida yana qisqartiramiz», - dedi u.

Taʼkidlanishicha, har bir mutaxassislik va kasb boʻyicha malaka talablarini ishlab chiqish muhim. Hozir Bandlik va mehnat munosabatlari vazirligi bilan shu yoʻnalishda ish olib borilayotgani, bunga 1 yil vaqt kerak ekani aytiladi.