Nogironligi bo‘lgan yoshlarga o‘qish, yashash va transport xarajatlarini qoplash uchun subsidiya ajratish tartibi to‘g‘risida ma’lumot berildi.

Hukumatning 341-sonli qaroriga asosan, Davlat xizmatlari markazlari yoki Yagona portal orqali ariza beriladi.

O‘qish xarajatlari uchun subsidiya olishda:

• agar ariza o‘n olti yoshga to‘lmagan nogironligi bo‘lgan bola qonuniy vakili tomonidan berilsa, uning shaxsiy identifikatsiya raqami (JShShIR) va bola qonuniy vakili ekanini tasdiqlovchi hujjat;
• nodavlat ta’lim tashkiloti tomonidan ariza beruvchini o‘qitish to‘g‘risida shartnoma elektron nusxasi (pdf yoki jpg formatda) yuboriladi.

Shartnomada nodavlat ta’lim tashkiloti nomi, STIRi, bank hisobvarag‘i, joylashgan manzili, ariza beruvchi o‘qishni istagan kasb-hunar turi yoki ta’lim yo‘nalishi, o‘qish muddati, o‘qish bir oylik va umumiy to‘lov miqdori ko‘rsatilishi lozim.

Yashash va transport xarajatlari uchun subsidiya olishda:

• transport xarajatlarini qoplash so‘ralganda — yo‘l xarajatlarini tasdiqlovchi hujjatlar elektron nusxalari (agar mavjud bo‘lsa, pdf yoki jpg formatda);
• yashash xarajatlarini qoplash so‘ralganda — ijara shartnomasi va uning soliq organlarida hisobga qo‘yilgani haqida bildirishnoma elektron nusxasi (agar mavjud bo‘lsa, pdf yoki jpg formatda).

Arizalarni ko‘rib chiqish muddati - 15 ish kuni.