Joriy oʻquv yili uchun magistraturaga qabul kvotasi soni 16 933 ta boʻlishiga qaramay, jami 10 031 nafar talabgor hujjat topshirgan. Shundan ham 5 219ta ariza qabul qilingan. 

Oliy taʼlim vazirligi vakili Moʻmin Ibodov bergan maʼlumotga koʻra, arizasi qabul qilinganlarning 4 582tasi xorijiy til sertifikatiga ega boʻlgan. 637 nafar talabgor esa, tanlovda ishtirok etmaydigan turli imtiyozlari boʻlgan.

Ibodov, shuningdek, joriy yilgi magistraturaga qabul kvotasi toʻlmaganligi yuzasidan bildirilayotgan mulohazalarga ham toʻxtaldi.

“Yangi joriy qilingan tartibga koʻra, bu yildan magistraturaga qabul bir yilda 2 marotaba amalga oshiriladi, yaʼni yanvar oyiga boʻsh oʻrinlarga yana konkurs tashkil etiladi”, – deydi u.