Sankt-Peterburgda Interpol tomonidan xalqaro qidiruvga berilgan Oʻzbekiston fuqarosi qoʻlga olindi. Bu haqida Interpolning Oʻzbekistondagi Milliy markaziy byurosi xabar berdi.

Qayd etilishicha, 2021-yil yozida bu shaxs Telegramʻda guruh tuzgan va uning ishtirokchilarini ikki baravar daromad olishga qiziqtirib, firibgarlik yoʻli bilan ularni plastik kartaga pul oʻtkazishga koʻndirgan. Vaʼdasini bajarmagan bu shaxs oʻzgalar pullarini oʻzlashtirib olib, qochib ketgan.

Joriy yil iyul oyida jinoyatchi Interpol Oʻzbekistondagi Milliy markaziy byurosi tomonidan Oʻzbekiston Jinoyat kodeksi 168-moddasi 3-qismida (firibgarlik) koʻrsatilgan jinoyatni sodir etganlikda ayblanib, xalqaro qidiruvga berilgan. 

Axborot taʼminoti va tezkor-qidiruv tadbirlari natijasida uning yashiringan joyi aniqlanib, tez orada Sankt-Peterburg shahrida qoʻlga olindi. 

Hozirda u jazoga tortilish uchun sudga topshirish maqsadida Oʻzbekistonga ekstraditsiya qilinishi kutilmoqda.