Poytaxtimiz Toshkentda yo‘lovchilarning katta qismi metro xizmatidan foydalanadi. Chunki metro eng qulay, xavfsiz va tezkor transport turi.
 

"Toshkent metropoliteni" axborot xizmatining xabar berishicha, Toshkentdagi ayrim metro bekatlarining ish vaqti 1 iyundan o‘zgartiriladi.

Ma’lum qilinishicha, metro yo‘lovchilariga qulaylik yaratish, xizmat ko‘rsatish sifatini yanada oshirish maqsadida 1 iyundan boshlab Toshkent metropolitenining «Hamid Olimjon», «Pushkin», «Mirzo Ulug‘bek», «Oybek», «Beruniy», «Abdulla Qodiriy», «Novza», «Toshkent», «Kosmonavtlar», «Chorsu», «Tinchlik», «Turkiston», «Shahriston», «Bodomzor» hamda «Minor» metro bekatlarining 2-vestibyuli (kirish va chiqish qismi) tonggi soat 05:00 dan kech soat 00:00 ga qadar yo‘lovchilarga xizmat ko‘rsatadi.

Shu kunga qadar esa ushbu bekatlarning 2-vestibyuli (kirish va chiqish qismi) tonggi soat 07:00 dan 19:00 ga qadar yo‘lovchilarga xizmat ko‘rsatgan.

Ta’kidlash joizki, metro bekatlaridagi  bu o‘zgarishlar poytaxt yo‘lovchilariga yanada qulaylik yaratishda alohida ahamiyat kasb etadi.