Alisher Navoiy nomidagi Toshkent davlat oʻzbek tili va adabiyoti universitetida “Oʻzbek shevalari tadqiqotlari: amaliyot, metodologiya va yangicha yondashuv” mavzusida ilmiy-nazariy konferensiya tashkil etildi. Anjuman mamlakatimizda ilk bor yaratilgan “Oʻzbek dialektologiyasi” darsligining 60 yilligiga bagʻishlandi.

Konferensiyada sheva so‘zlarni yig‘ish borasida oʻquv amaliyotini tashkil etish, toʻplangan materiallarni qayta ishlash, tajriba almashish, oʻzbek shevalarini oʻrganishda yosh tadqiqotchi mutaxassislar qamrovini kengaytirish va samarali natijalarga erishish kabi masalalar qamrab olindi.

Shoʻbalar ishida oʻzbek adabiy tili va shevalar munosabati, shevalarning oʻziga xosliklari, oʻzbek shevalarini areal oʻrganish va tarixiy dialektologiya, dialektologiya va lingvokulturologiya, dialektal leksikografiya, toponimiya va terminologiya, oʻzbek shevalari leksikasi kabi mavzular yuzasidan fikr almashildi.