Toshkent viloyatining Boʻstonliq tumanida sharshara tepasidan yiqilib tushgan fuqaroga yordam koʻrsatildi, deb xabar beradi FVV matbuot xizmati.

Maʼlum qilinishicha, 2-may kuni soat 15:00 da “Yangiqoʻrgʻon” qishlogʻiga tabiat qoʻynida dam olish uchun borgan fuqarolardan biri “Soy mazor” sharsharasi tepasiga chiqib, rasmga tushmoqchi boʻlgan va ehtiyotsizligi oqibatida tepalikdan yiqilib tushgan. U oʻng oyogʻining son qismini sindirib olgani boʻyicha viloyat FVBga xabar kelib tushgan.

Voqea joyiga zudlik bilan Boʻstonliq tumani Chimyon yongʻin-qutqaruv otryadi qutqaruvchilari yetib borib, jabrlangan fuqaroga birinchi tibbiy yordam koʻrsatgan va tepalikdan olib tushib, tez tibbiy yordam xodimlariga topshirgan. Malakaviy tibbiy yordam koʻrsatish uchun Boʻstonliq tumani markaziy shifoxonasiga yuborilgan.