Oʻzbekistonda tibbiyot muassasalarining malakali shifokorlariga qoʻshimcha ustama toʻlanadi. Bu haqida Sogʻliqni saqlash vazirligi matbuot xizmati xabar berdi.

Maʼlum qilinishicha, sogʻliqni saqlash vazirining tegishli buyrugʻi bilan davlat tibbiyot muassasalarining malakali shifokorlarini ragʻbatlantirish yoʻlga qoʻyilgan.

Unga koʻra, mazkur tizim xalqaro reytinglarda tibbiyot yoʻnalishida birinchi 200 talikka kirgan oliy oʻquv yurtlarining klinik ordinatura (rezidentura), magistratura mutaxassisligini tamomlagan va falsafa doktori (PhD) yoki fan doktori (DSc) ilmiy darajasini olgan tibbiyot xodimlariga tatbiq etiladi. Nomzodlar tomonidan arizalar muassasaning kadrlar boʻlimiga topshiriladi.

Hujjatlar navbatdagi bosqichda vazirlikning Fan va taʼlim boshqarmasi tomonidan koʻrib chiqilgach, vazir buyrugʻi orqali ragʻbatlantiriladi. Nomzodlarning lavozim maoshiga har oylik qoʻshimcha ustama vazir buyrugʻi chiqqan kundan boshlab bir yil davomida mehnatga haq toʻlash eng kam miqdorining quyidagi baravarida belgilanadi:

• klinik ordinatura (rezidentura), magistratura mutaxassisligini tamomlagan tibbiyot xodimiga – yetti baravari;
• falsafa doktori (PhD) yoki fan doktori (DSc) ilmiy darajasini olgan tibbiyot xodimiga – oʻn besh baravari.