Xabaringiz bor, 18-22-aprel kunlari Kinematografiya agentligi tashabbusi bilan Toshkent xalqaro animatsiya forumi oʻtkazildi.

Forum Shveysariya va Isroilning Oʻzbekistondagi elchixonalari, Toshkentdagi Gyote instituti, Bazelevs kinokompaniyasi, Milliy kinematografiyani rivojlantirish markazi, Oʻzbekiston Milliy kinofondi hamda “DRF” community independent filmmakers of Uzbekistan” kinostudiyasi hamkorligida tashkil etildi.

Unda Germaniya, Gruziya, Isroil, Ozarbayjon, Tojikiston, Rossiya, Ukraina, Chexiya, Qozogʻiston va Qirgʻiziston davlatlaridan animatsiya mutaxassislari, shu bilan bir qatorda oʻzbek animatorlari va “Aqlvoy”, “Bolajon” telekanallaridan vakillar ishtirok etishdi.

Forum doirasida bolalar uchun turli tadbirlar, vorkshoplar, mahorat darslari, ijodiy uchrashuvlar, davra suhbatlar, milliy va xorijiy multqahramonlar ishtirokida chiqishlar, fleshmob va boshqa bayramona shoular taqdim etildi.

Shuningdek, Anton Bolkunov, Elchin Xami Axundov, Zurab Diasamidze, Yuliya Drobova, Maks Epshteyn, Karina Xananeya kabi animatsiya mutaxassislari tomonidan mahorat darslari boʻlib oʻtdi.

Bundan tashqari forum ishtirokchilariga Oʻzbekiston milliy kinofondidan joy olgan bolajonlar auditoriyasiga moʻljallangan klassik animatsion filmlar namoyish qilindi. Yosh animatorlarning “Moments”, “Moya mama poxoja na mikrovolnovuyu pech”, “Ya tebya pomnyu”, “Zoopark” nomli qisqa metrajli animatsion filmlari taqdimoti tashkil etildi.

Forum doirasida rossiyalik jurnalist, animatsiya tanqidchisi Dina Goder bilan uchrashuv boʻlib oʻtdi. Unda mehmon “Nedetskaya Animatsiya” nomli maʼruza bilan ishtirok etdi.

Shuningdek, xalqaro tanlovlarda ishtirok etgan “Huwaydo” , “Devushka i oblako”, “La Gare”, “Blake Inmortales Ayan Marokkanskiy”, ”Author And The Nose“ ,”Ne vыxodya iz komnatы“, ”The Sound of Silence“, ”Lastik“, ”NOT DED" kabi mashhur animatsion filmlar tomoshabinlarga taqdim etildi.

“Bazelevs Animation”, “Futurist”, “Dip animation” studiyalari va “Bolajon” telekanali faoliyati boʻyicha taqdimotlar qilindi.

Forum soʻngida gʻoliblar quyidagi nominatsiyalar boʻyicha mukofotlandi:

“Gran pri” – “Na ptichix pravax ” Anita Chernыx (Qozogʻiston)

Hakamlar hayʼati eʼtirofi - “Devushka i oblako” - Shokir Xoliqov (Uzbekiston)

Hakamlar hayʼati eʼtirofi - “Sound of Silence” - Farhod Gafforpur (Tojikiston)

Yosh hakamlar sovgʻasi - “Author and the Nose” - Janna Abasova (Kirgʻiziston,Turkiya)

Animatsiya sohasi rivoji uchun qoʻshgan hissasi uchun maxsus mukofot - Elchin Xaami Axundov (Ozorbayjan)

Eng yaxshi daqiqali film - “Delo Semeynoye” – Malikaxon Zaynutdinova.