Toshkentdan Andijonga harakatlanayotgan tezyurar poyezdga nomaʼlum shaxs tomonidan otilgan tosh vagon oynasini yorib oʻtib, 9 yoshli bolaning boshiga kelib urildi.

“Oʻzbekiston temir yoʻllari” matbuot xizmatining maʼlum qilishicha, voqea 10-aprel kuni soat 22:25 da Oltiariq–Margʻilon uchastkasining 244-kilometrida yuz bergan.

Toshkent–Andijon yoʻnalishida harakatlanayotgan 62-sonli yoʻlovchi poyezdiga nomaʼlum shaxs tomonidan otilgan tosh 6-vagon oynasini yorib oʻtib, 9 yoshli yoʻlovchining boshiga urilgan. Zarba bola qoshining ustki qismiga tegishi oqibatida qon ketishiga sabab boʻlgan. Soat 22:32 da “Margʻilon” temir yoʻl vokzali feldsheri tomonidan jabrlangan yoʻlovchiga zudlik bilan birinchi tibbiy yordam koʻrsatilgan.

Holat yuzasidan tegishli idoralar tomonidan surishtiruv ishlari olib borilmoqda.