Prezident Shavkat Mirziyoyev huzurida xalq taʼlimi sohasida amalga oshirilayotgan islohotlar natijadorligiga bagʻishlangan kengaytirilgan yigʻilish boshlandi. 

«Yanvar oyida maktab taʼlimini rivojlantirish boʻyicha 5 ta ustuvor yoʻnalishda aniq vazifalarni belgilab, barcha masalalar hal qilib berilgan edi.

 

Lekin birorta islohot oson boʻlmaydi.

 

2022-yilni hokimlarning maktabga eʼtibori yili deb eʼlon qilganimiz va tuman hokimi “RayonO” mudiri boʻladi, degan vazifalarni, afsuski, hamma hokimlar ham hali toʻliq tushunib yetgani yoʻq», dedi davlatimiz rahbari.

Prezident sohadagi ishlar ahvoli qoniqarsizligi uchun viloyat va tuman hokimlarini keskin tanqid qildi.

Jumladan, ikki oyda barcha hududlarda oʻtkazilgan oʻrganishlar natijasida respublikadagi 852 ta maktabda taʼlim sifati, muallimlar salohiyati va oʻquvchilarning oliygohlarga kirish darajasi ancha pastligi aniqlangan.

Bu borada eng ogʻir ahvol Qashqadaryo, Surxondaryo, Toshkent viloyati va Qoraqalpogʻistonda ekani koʻrsatib oʻtildi.